Roselle Sia Banyak Buah...

Hello Secret Readers...

Kemarin petang sia tinguk Roselle sia punyalah lebat buah...

Tapi sayang ba,,ni budak2 main bola, goal post dorang menghala NGAM-NGAM di depan pintu masuk sia punya MINI GARDEN (samak rumput sudah skarang)

Apalagi ni roselle mangsa popiang ja..

Ada yang patah, ada yang barat sabalah, ada yang cium tanah sudah,

Jadi kemarin lapas sia main basikal trus sia pi kasi bersih ni roselle..

Apa yang sia buat..??

Sia kasi buang tu rumput di keliling tu roselle..

Sia kasi gembur tu tanah..

Sia nampak ada satu batang bambu dakat tu pisang sia ambil..

Sia minta dad sia parang,,then sia putung dua..

Untuk apa...??

Sia taruh tu bambu di hujung & hujung..

Pastu sia nampak mama sia punya bikin lilit kacang panjang sia cabut,,,kacang panjang dia sia kasi lilit di tiang pagar..hahaa confirm kana marah punyalah..

Bukan apa ba..galap sudah kalau mo pi cari kayu di bukit..jadi sia 'pinjam' jalah dulu..

Jadi tu kayu sia simpan di atas..

Sia cari tali rapiah pastu sia ikat hujung tu roselle..sia gantung di kayu yang sia simpan di atas tu dua bambu tadi..

Jadi tedalah lagi kes cium tanah...

Tadi sia sms Ps. Libit sia mo minta lagi tu bibit roselle yang jenis basar punya..

Tapi dia bilang,,belum ada yang tua..yang kicil adalah..

Trus sia bilang ba bulihlah..bawa ni malam Rabu..JAN LUPA TAU (mimang huruf basar..)

Dia nogi balas sia..ba nanti Sabat ko bawa bikin minum time potluck..wkwkwkwk

Actually,,ni bibit mimang sia dapat dari Ps. Libit time caroling tahun lalu..

Banyak sia pi ambil.. 

Banyak juga sia tanam..tapi yang jadi 4 pokok ja..

Mungkin kana kakai ayam kali kah..kah..kah..

Ni patang sia mo pi kasi bersih lagi..

Ada lagi sia mo tanam..la~la~la~la~la...

Korang pun tanamlah..bulih jadi bunga juga ni..

Selamat berkebun haha.. :-)